GREQI - KËSHILLI I EVROPËS SHPREH SHQETËSIM PËR KEQTRAJTIMIN E TË BURGOSURVE

Rreziqet për keqtrajtime mbeten "të konsiderueshme" për persona që mbahen në komisariatet e policisë në Greqi, mësohet nga një raport i publikuar sot nga Këshilli i Evropës në Strasburg.
     Raporti, që bëhet pas një vizite të Komitetit për Parandalimin e Torturës (CPT) në shtator në Greqi, theksoi gjithashtu se kushtet e burgosjes së shumicës së imigrantëve të paligjshëm "mbeten të papranueshme".
     Përmirësimet modeste të konstatuara "mbeten gjerësisht rrjedhojë e iniciativave personale", më tepër se sa e një politike të përgjithshme", shpreh keqardhjen CPT-ja.
     Disa të burgosur janë ankuar për sulme fizike nga efektivat e policisë.
     Kontakti me një avokat ose një mjek nuk është i organizuar në mënyrë të kënaqshme, vazhdon CPT-ja që kërkon disa hetime të shpejta në rast kallëzimesh për keqtrajtime.
     Kushtet e burgosjes së imigrantëve të paligjshëm vazhdojnë të jenë të këqija në krahasim me vizitën e kryer në vitin 2007 dhe nuk mund të justifikohen me "valën aktuale të imigracionit të parregullt drejt Greqisë", bëjnë të ditur ekspertët e pavarur të komitetit. Disa persona kanë përmendur edhe rrahje, goditje dhe fyerje.
     Misioni konstatoi se në burgun Feres, 95 persona mbaheshin në dy qeli prej 49 metrash katrorë secila. Katër imigrantë kinezë ndodheshin në një qeli me 40 burra.
     Shumë qeli nuk kanë dritë natyrore dhe u mungojnë kushtet higjenike dhe të ajrimit si në Xanthi (posta e policisë kufitare), ku flihet me radhë në dyshekë ose batanije të vendosura në tokë.
     Autoritetet greke i kanë kundërshtuar pjesërisht konkluzionet e raportit, duke u shprehur se "rastet e njohura për sjellje të papërshtatshme janë ndëshkuar rëndë".
     CPT-ja ka të drejtë të vizitojë të gjitha burgjet, komisariatet e policisë, spitalet psikiatrke, në 47 shtetet anëtare të Këshillit të Evropës për të parandaluar torturën ose keqtrajtimet çnjerëzore ose ofenduese.