KOSOVA PËRKUJTON 19-VJETORIN E DEKLARATËS KUSHTETUESE TË 2 KORRIKUT PËR PAVARËSINË

Kosova përkujton sot 19-vjetorin e Deklaratës Kushtetuese, me të cilën më 2 Korrik 1990 shënoi hapin e madh institucional të procesit të gjatë për pavarësi.

Deklarata u shpall në gjendje të jashtëzakonshme të shtetrrethimit ushtarako-policor që kishte vendosur Beogradi.
Deklarata Kushtetuese e 2 Korrikut 1990, bashkë me aktet e tjera madhore që e pasuan, si Kushtetuta e Kaçanikut e 7 shtatorit 1990, referendumi për pavarësi i shtatorit 1991 dhe zgjedhjet e para parlamentare e presidenciale të 24 majit 1992 të Republikës së Kosovës, atëherë të panjohur ndërkombëtarisht, shënojnë kthesën historike në lëvizjen demokratike gjithëpopullore kosovare për liri e pavarësi, të fillimviteve '90 të shekullit të kaluar.

Në shenjë mirënjohje për veprën e madhe të 2 Korrikut, presidenti i Republikës së Kosovës,  Fatmir Sejdiu do të presë sot delegatët e Kuvendit të Kosovës, të cilët më 1990 shpallën Deklaratën Kushtetuese. 
Ata do të priten edhe nga Kryetari i Aleancës për Ardhmërinë e Kosovës (AAK), Ramush Haradinaj, si dhe nga përfaqësues të tjerë institucionalë e politikë të shtetit të Kosovës, të njohur deri tash, që nga shpallja e pavarësisë më 17 shkurt 2008,  nga 60 vende të botës.