Arrestohet arkitekti i sulmeve në Indi

Njoftimet nga Pakistani bëjnë të ditur se forca të armatosura kanë kryer bastisje dhe arrestime në një kamp të përdorur nga grupi militant i ndaluar Lashkar-e-Toiba, në zonën e Kashmirit që kontrollohet nga Pakistani. Nuk ka patur asnjë koment zyrtar as nga qeveria dhe as nga ushtria.Njoftimet të pakonfirmuara tregojnë se një prej të dyshuarve si arkitekti i sulmeve të Bombeit, Zaki-ur-Rehman Lakhvi është në mesin e të arrestuarve.
Sulmi ndodhi në periferi të Muzaferabadit në pjesën e Kashmirit që administrohet nga Pakistani. Forcat e sigurisë sulmuan një kamp që kontrollohej nga organizata islamike e bamirësisë, Jamaat ud Dawa.
Ka shumë nga ata që besojnë se kjo shoqatë është fronti civil i grupit militant Lashkar-e-Taiba. Zona përreth vendit është bllokuar. Banorët lokalë thanë se trupat hynë në këtë zonë, në mënyrë të fshehtë përmes një helikopteri të ushtrisë. Gjatë operacionit u dëgjuan shpërthime dhe siç thuhet u kryen disa arrestime.
Një prej të ndaluarve thuhet se është një komandant i lartë i grupit, Lashkar-e-Taiba, të cilin indianët e akuzojnë dhe kanë ndihmuar në planifikimin e sulmeve të Bombeit.
Ky njoftim citon zyrtarë të forcave të sigurisë dhe të qeverisë, të cilëve nuk u është dhënë emri, por megjithatë njoftimet mbeten të pakonfirmuara. Pakistani veproi pas një presioni të fortë nga India dhe SHBA-ja