GAZA- 97 PËR QIND E VIKTIMAVE I PËRKASIN HAMASIT

Një zëdhënës i qeverisë izraelite, Avi Pazner, tha sot se "97 për qind e palestinezëve të vrarë ose të plagosur" nga sulmet ajrore në Rripin e Gazës i përkasin lëvizjes islamike Hamas, në një intervistë për radion franceze RTL.
"97 për qind e palestinezëve të vrarë ose të plagosur i përkasin grupit terrorist Hamas. Nga 230 të vrarët në Gaza, 218 janë terroristë që i kapëm në befasi në ceremoni, ndërsa po përpiqeshin me shumë arrogancë të sfidonin Izraelin duke vazhduar  të hidhnin raketa  dhe predha në jug të vendit", deklaroi ai. 
"Fatkeqësisht pati gjithashtu disa viktima civilë, sepse është e pamundur në kushtet e densitetit që mbretëron në Gaza të arrish një rezultat 100 për qind dhe ne shprehim keqardhjen për çdo humbje civile", shtoi ai.
Shërbimet palestineze të urgjencës flasin për 282 të vdekur dhe më shumë se 600 të plagosur në sulmet izraelite të ndërmarra të shtunën në Rripin e Gazës.