SHBA - DHUNA NË GAZA: RICE SHTON KONTAKTET PËR NJË ARMËPUSHIM

Sekretarja amerikane e Shtetit, Condoleezza Rice, bisedoi në telefon me sekretarin e përgjithshëm të Kombeve të Bashkura dhe me drejtues të tjerë të botës në përpjekje për rivendosjen e një armëpushimi mes Izraelit dhe Hamasit, njoftoi sot Departamenti i Shtetit.
Shtetet e Bashkuara "po përpiqen për një armëpushim që do të respektohet plotësisht, do të jetë i gjatë dhe i qëndrueshëm", deklaroi zëdhënësi i Departamentit të Shtetit, Gordon Duguid, ndërkohë që Izraeli sulmonte sot objektiva të lëvizjes islamike Hamas për të tretën ditë radhazi në Rripin e Gazës, ku sulmet e tij kanë shkaktuar më tepër se 345 të vdekur, 57 prej të cilëve civilë.
Për rivendosjen e armëpushimit, shefja e diplomacisë amerikane bisedoi me Ban Ki-moon, me kryeministrin izraelit Ehud Olmert, me kryeministrin libanez Fuad Siniora, me Përfaqësuesin e Lartë të Bashkimit Evropian për Politikën e Jashtme, Havier Solana, si dhe me homologët francez, britanik, kanadez, egjiptian, saudit, turk dhe izraelit.
Operacioni izraelit ndodh pas një përshkallëzimi të dhunës që prej përfundimit të armëpushimit mes Izraelit dhe Hamasit më 19 dhjetor