NUK KA TË VDEKUR NË AKSIDENTIN E AVIONIT TURK NË AMSTERDAM

Aksidenti i një avioni të shoqërisë "Turkish Airlines", që ndodhi sot në Amsterdam, nuk ka shkaktuar të vdekur, njoftoi ministri turk i Transporteve, Binali Yildirim.
"Ky aksident për fat të mirë nuk ka shkaktuar humbje në njerëz", u deklaroi ministri gazetarëve.
Temel Kotil, Presidenti Drejtor i Përgjithshëm i "Turkish Airlines", konfirmoi gjatë një konference shtypi në Stamboll, ku ndodhet selia e kompanisë, se të gjithë pasagjerët dhe ekuipazhi i avionit i kishin mbijetuar aksidentit.
Më parë, një zyrtar i shoqërisë, Hamdi Topçu, ka përmendur një të vdekur dhe rreth 20 të plagosur në aksidentin që ndodhi pranë aeroportit ndërkombëtar Schiphol, në çastin kur avioni po përpiqej të ulej.
Yildirim deklaroi se rreth 80 pasagjerë mundën të evakuoheshin nga avioni. Ai përmendi të plagosur, por nuk dha hollësi për numrin e tyre.
 Ministri deklaroi se aeroplanit, të vënë në shërbim në vitin 2002, i ishin bërë kontrolle teknike më 22 dhjetor të vitit 2008.