ITALIA I RIKTHEHET ENERGJISË BËRTHAMORE

Italia dhe Franca do të prodhojnë së bashku energji bërthamore. Kryeministri Italjan Silvio Berkuskoni dhe presidenti Francez Nikola Sarkozi nënshkruan dje në Romë një marrëveshje, që parashikon bashkëpunimin mes dy vendeve për prodhimin e energjisë atomike dhe i hap rrugën ndërtimit në Itali të centraleve bërthamore të gjeneratës së tretë. 
Kryeministri Italjan Berluskoni u shpreh mjaft i kënaqur nga nënshkrimi i marrveshjes. Ai tha "se kthimi tek energjia bërthamore është i pashmangshëm."
"Italia,- u shpreh ai,- duhet të zgjohet nga gjumi dhjetëravjeçar dhe të fillojë ndërtimin e centraleve bërthamore me ndihmën e miqve Francezë."
Franca do të vërë në dispozicion të palës Italjane know-hown dhe teknologjinë e saj, duke i ndihmuar Italjanët të kursejnë vite pune dhe para. "Deri më sot,- theksoi Berluskoni,- pengesë për zhvillimin e këtij sektori ka qënë fanatizmi ideologjik i ambjentalistëve."
Ndërsa sipas Presidentit Sarkozi, marrveshja e ditës së sotme mund të konsiderohet historike. Ai tha se, " Franca është e gatshme për një bashkëpunim të pakufizuar, sapo Italia të ketë konfirmuar zyrtarisht kthimin e saj tek energjia bërthamore (gjë për të cilën pritet aprovimi në parlament i dekretit qeveritar)."
Përveç protokollit ndërqeveritar, u nënshkruan gjithashtu edhe dy memorandume mirëkuptimi mbi energjinë bërthamore mes ENEL-it dhe EDF-it, gjigandëve energjitikë publikë të Italisë dhe Francës.
Bashkëpunimi mes dy kompanive do të konkretizohet në krijimin e një joint-venture-i. Si rezultat i aleancës së tyre në Itali do të ndërtohen katër centrale bërthamore, i pari prej të cilëve do të jetë gati në vitin 2020. Secili prej centraleve do të ketë një fuqi prej 1600 megawatt, për një total prej 6400 Mw, që do të mbulojnë 25% të konsumit të energjisë në Itali./a.gj/