SHPËRNDAHEN LEJET E LEGALIZIMIT PËR OBJEKTET ME SHTESA

Agjensia e Legalizimit, Urbanizimit dhe Integrimit të Zonave/Ndërtimeve Informale vazhdon me ritme të shpejta shpërndarjen e Lejeve të Legalizimit, sipas kalendarit të paracaktuar. 
Të enjten në Tiranë, procesi vazhdoi me shpërndarjen e Lejeve të Legalizimit për apartamente, objekte social - ekonomike, garazhe dhe podrume me një total prej 6200 pasurish familjare.
Drejtori i Përgjithshëm i ALUIZNI-it, Shaban Memia, theksoi gjatë ceremonisë së zhvilluar sot se "sipërfaqja që  legalizohet është 662.559 m2, ndërsa vlera e kësaj sipërfaqe e kalon shumën 2 miliard euro (me çmim minimal tregu prej 300 euro m2), e cila tashmë bëhet pjesë e tregut".
Sipas të dhënave zyrtare të kësaj Agjensie, aktualisht, në mbarë vendin janë në proces përpunimi 134 341 dosje objektesh informale, ndërkohë që ka përfunduar përgatitja e dokumentacionit tekniko-ligjor dhe pritet të legalizohen afro 12 297 objekte informale, të cilat gjenden në fazën përfundimtare të likujdimit të detyrimeve financiare nga qytetarët.
Deri në këtë moment ALUIZNI ka përmbyllur plotësimin e dosjeve, dhe ka gati për pajisje me leje legalizimi, 4 504 objekte, për të cilat qytetarët kanë shlyer detyrimet financiare. 
Legalizimi i këtyre pasurive informale do të pasohet nga procesi i regjistrimit të tyre në zyrat vendore të regjistrimit të pasurive të paluajtshme, në funksion të përfshirjes së tyre në sistemin kombëtar të regjistrimit dhe pajisjes me tituj pronësie, brenda afateve të parashikuara në kuadrin ligjor.