HETIMI I GËRDECIT-PROKURORIA ËSHTË KEQPERDORUR POLITIKISHT

- Kryeministri Berisha shprehet se aksidenti tragjik i Gërdecit ishte tërësisht i parandalueshëm -

Kryeministri Sali Berisha deklaroi të enjten se “institucioni i Prokurorisë është keqpërdorur politikisht në mënyrën më ekstreme për sa i përket hetimit për çështjen e Gërdecit”.
Gjatë emisionit televiziv “Opinion” në TV Klan, Kryeministri Berisha u shpreh se “Gërdeci është  një nga aksidentet më tragjike të vendit, një aksident tragjik plotësisht i parandalueshëm, i cili mori jetën e 27 qytetarëve të pafajshëm dhe rrëzoi me qindra e mijëra shtëpi e biznese”. 
Por, sipas Kreut të Qeverisë, “Kryeministri i ka nxjerrë në kohën dhe momentin e duhur të gjitha përgjegjësitë nga ky aksident tragjik i parandalueshëm”.
“Përgjegjësitë ligjore tani i takon t’i nxjerrë në mënyrë përfundimtare sistemi i drejtësisë dhe në mënyrë absolute qeveria është angazhuar me të gjithë potencialin për të ndihmuar hetimin, duke i’u përgjigjur çdo kërkese të prokurorisë”, u shpreh Kryeministri Berisha.
Akuza e ngritur një vit më parë se Fatmir Mediu kishte shmangur ushtrinë në vendimet e marra për aktivitetin që zhvillohej në Gërdec, sipas Kryeministrit Berisha, “synonte vetëm të bënte një devijim madhor të hetimit”.
“Kur apriori i thuhet shqiptarëve se Ministri i Mbrojtjes ka shmangur ushtrinë, në një kohë kur ekzistonin 32 dokumenta secili me 4 - 7 firma ushtarakësh për këtë aktivitet, do të thotë se bën një akt të shëmtuar politik për të shkatërruar hetimin”, u shpreh Kryeministri Berisha.
Në këtë drejtim, Kryeministri theksoi se “ky hetim u ndërmor nga premisa politike dhe keqpërdorimi politik i institucionit të prokurorisë është një fatkeqësi, pasi ky institucion është keqpërdorur në mënyrën më ekstreme”.
I pyetur se për se nuk urdhëroi shkarkimin e menjëhershëm të Ministrit të atëhershëm të Mbrojtjes, Mediu, siç ndodhi në rastin “Pango”, Kryeministri u shpreh se “ajo ishte një situatë e vërtetë lufte, për të cilën është organizuar operacioni më i shkëlqyer i shpëtimit”. “Nëse unë shkarkoja Mediun, atëhere me kë do të punoja. Në një rast të tillë dorëheqja ishte një gjë e vetëkuptueshme”, sqaroi Kryeministri Berisha.