PS : QEVERIA NUK PO NJEH PËRGJEGJËSITË E KRIMIT SHTETËROR TË GËRDECIT

Partia Socialiste ka akuzuar sot qeverinë se nuk po njeh fajet dhe përgjegjësitë e krimit shtetëror të Gërdecit.
Sekretari për Çështjet Juridike në Partinë Socialiste Ylli Manjani tha sot  gjatë një konference për shtyp se '' Edhe pas një viti nga krimi shtetëror i Gërdecit qeveria vazhdon të mos njohë fajet dhe përgjegjësitë, duke mos patur edhe kurajon për të  kërkuar falje publike ndaj banorëve të Gërdecit''
Sipas tij, është i papracedent pozicioni juridik dhe kushtetues i kësaj qeverie, e cila në vend që të mbështesë Prokurorinë dhe drejtësinë për hetimin dhe gjykimin e drejtë të fajtorëve të këtij krimi, ka një vit që është pozicionuar kundër hetimit, kundër prokurorisë, kundër kushtetutës dhe ligjit në vend.
Qeveria shqiptare në një vjetorin e tragjedisë së Gërdecit ka shprehur ngushëllimet  dhe solidaritetin me familjet e viktimave.

Zëdhënësja e Kryeministrit Juela Meçani, tha se, "Qeveria i siguron ata të gjithë se sikundër deri tani do të jetë bashkë më ta, do të ofrojë të gjithë mbështetjen dhe solidaritetin për kapërcimin e pasojave afatmesme dhe afatgjata të këtij aksidenit tragjik".