"BANDA E CËRRIKUT"- DEBATE TË ASHPRA NË SEANCË

Tension dhe debate të ashpra shkaktoi të martën në Gjykatën e Krimeve të Rënda,  dëshmia e Bujar Buzanit,  të penduarit të "Bandës së Cërrikut", anëtarët e së cilës,  akuzohen për vrasjen e 6 punonjësve të Gardës së Republikës dhe plagosjen e disa të tjerëve  në vitin 1997 në Cërrik.   
Debatet nisën sapo  Buzani filloi të flasë para trupës gjyqësore për ngjarjen e ndodhur 12 vjet më parë në Cërrik  Duke e kundërshtuar dëshminë e Buzanit,  njëri nga  të pandehurit u largua nga salla e Gjykatës. 
Një tjetër prej tyre, duke e drejtuar gishtin tregues nga përfaqësuesit e Prokurorisë së Krimeve të Rënda,  tha se po manipulohet me dëshminë e  Buzanit. Më pas sallën e braktisi edhe një nga mbrojtësit ligjor të të pandehurve të procesit, c'ka solli ndërprerrjen e seancës.
Në këto kushte, trupa gjyqësore vendosi zhvillimin e seancës javën e ardhshme.  Dëshmia e Buzanit,  cilësohet si mjaft e rëndësishme në zbardhjen e kësaj ngjarje të rëndë të ndodhur  në 1997 në Cerrik.  
Të pandehur në këtë proçes janë: Llazar Bicja,  Met Bozi,  Arjan Toska,  Roland Sota (Xhepexhiu),  Alban Toska,  Skënder Cani, Tomorr Buzani,   Entel Gashi si dhe Bujar Buzani, i cilësuar si i penduari i bandës.  
Këta persona,  shumë prej tyre të arrestuar vitin që shkoi nga Policia e Shtetit në bashkëpunim me Prokurorinë e Krimeve të Rënda akuzohen  për vrasjen me armë zjarri të  6 punonjësve të Gardës së Republikës si dhe plagosjen e disa efektivëve të Policisë së Shtetit afro 12 vjet me pare në qytezën e Cërrikut.