OBAMA: SHQIPËRIA KA ARRITUR REZULTATE TË JASHTËZAKONSHME ME REFORMAT

Presidenti i Shteteve të Bashkuara të Amerikës, Barack Obama i uroi sot Shqipërisë dhe Kroacisë anëtarësimin në NATO, ndërkohë që vlerësoi edhe "rezultatet e jashtëzakonshme që kanë arritur këto vende me reformat".
"Vazhdimi në këtë rrugë do t’ju ndihmojë të bëheni edhe më të afërt me integrimin tuaj euroatlantik", u shpreh Presidenti Obama duke uruar mirëseardhjen në Aleancë.
Presidenti Obama  tha se "Shqipëria dhe Kroacia kanë bërë gjëra shumë të rëndësishme e domethënëse në emër të Aleancës". Duke përmendur 140 trupat shqiptarë dhe 235 trupa kroate që kanë shërbyer në Afganistan, Presidenti Obama u shpreh se "kjo është dëshmi se këto dy vende janë kontribues shumë të rëndësishëm të Aleancës". 
Shqipëria dhe Kroacia, vijoi Presidenti Obama, kanë dhënë një kontribut shumë të rëndësishëm në NATO në raport me madhësinë e vendeve të tyre, gjë që tregon se "për këto vende, NATO është përparësi".
"Ne jemi shumë të kënaqur dhe të entuziazmuar për pjesëmarrjen tuaj në Aleancën e Atlantikut të Veriut”, u shpreh Presidenti Obama.