ARRESTOHET NË ITALI NJË 49 VJEÇAR NGA TIRANA, I SHPALLUR NË KËRKIM PËR VRASJE

Një 49 vjeçar nga Tirana, i dënuar më parë nga drejtësia shqiptare për "vrasje", u arrestua në Itali dy ditë më parë, për t’u ekstraduar më pas drejt vendit tonë.
Burime zyrtare nga Policia e Shtetit bënë të ditur sot për ATSH-në se "Interpol Italia arrestoi më 4 prill të këtij viti në Torino shtetasin shqiptar Besim Doku, me qëllim për ta ekstraduar në vendin tonë për të vuajtur dënimin me 23 vjet heqje lirie të dhënë nga Gjykata e Tiranës në 25 qershor 2004, për një vrasje të kryer në vitin 1997".
Ngjarja për të cilën është dënuar 49 vjeçari Doku ka ndodhur më 19 maj 1997, kur ai, në bashkëpunim me shtetasin Artur Doku, në vendin e quajtur Bregu i Lumit,Tiranë, kanë vrarë për motive të dobëta shtetasin Ilmi Cuka si dhe kanë plagosur vëllain e tij,  Dalip Cuka.