SHKODËR: PASHKA NXJERR NGA NGUJIMI 4 FAMILJE KATOLIKE

Katër familje me probleme gjakmarrjeje në rrethin e Shkodrës janë pajtuar të dielën në Ditën e Pashkës Katolike.
“Krishti është ngjallur” është mesazhi që përcillet në këtë ditë të shënuar për të gjithë besimtarët katolikë, mesazh që sot u shoqërua me pajtimin e katër familjeve në hasmëri, dy prej të cilave me banim në Hotin e Ri dhe dy të tjera në Rranxa të komunës Bushat.
“Në emër të Krishtit të Kryqëzuar dhe të Ringjallur, katër familjet katolike u pajtuan, duke  rifituar qetësinë, gëzimin, lirinë dhe vëllazërim”, tha Arqipeshkvi Metropolitan i Dioqezës Shkodër-Pult, Imzot Angelo Masafra gjatë meshës solemne të Pashkëve të dhënë sot paradreke në Katedralen “Shën Shtjefni” të qytetit të Shkodrës.
Duke i konsideruar Pashkët si qendra e jetës së të krishterit, Imzot Masafra u shpreh se “Pashkët janë festa e jetës, pasi kremtojnë kapërcimin e vdekjes nëpërmjet jetës, Krishti e ka mposhtur vdekjen" tha ai. 
Imzot Angelo Masafra, u ndal në veçanti tek të sëmurët, duke i uruar që Jezusi i ngjallur të jetë forca, shpresa dhe hareja e përhershme e jetës, ndërkohë që përcolli urime edhe për të gjithë të katolikët që festojnë Pashkët brenda dhe jashtë Shqipërisë. 
Ceremonitë për festën e Pashkëve u organizuan dhe në kisha të tjera katolike në qytet dhe në gjithë qarkun e Shkodrës, ku është i përqëndruar ky komunitet besimtarësh. 
Ndërkohë drejtuesit e kishës katolike kanë pritur autoritete vendore si dhe përfaqësues të komunitetin ortodoks dhe mysliman, pët të cilët si zakonisht në bazë të traditës janë dhuruar vezët Pashkës