NË ZGJEDHJET E 28 QERSHORIT POLICIA E SHTETIT DO TË ZBATOJË VETËM LIGJIN

-Drejtori i Përgjithshëm i Policisë së Shtetit, Ahmet Prenci shprehet në Vlorë -

Në zgjedhjet e 28 qershorit Policia e Shtetit do të zbatojë vetëm ligjin, pa u bërë palë me asnjë subjekt politik, u shpreh sot drejtori i Përgjithshëm i Policisë së Shtetit, Ahmet Prenci, gjatë takimit me drejtuesit e policisë së disa qarqeve të vendit.
Qëllimi i  takimit, të zhvilluar paraditen e sotme në drejtorinë e policisë së qarkut të Vlorës, ku merrnin pjesë drejtues të policive Vlorës, Fierit, Beratit, Gjirokastrës dhe Korçës, ishte qartësimi i pozicionit të policisë para, gjatë dhe në përfundim të procesit zgjedhor, si dhe për plan veprimin e miratuar së fundi në lidhje me marrjen e masave për të parandaluar kultivimin e bimëve narkotike, bëri të ditur zyra e shtypit e Policisë së Shtetit.
Sipas kreut të Policisë së Shtetit, çdo implikim i punonjësit të policisë në proçesin zgjedhor, do jetë kthim mbrapa. "Ne si drejtues qendrorë dhe ju si drejtues në qarqe, do të monitorojmë çdo veprim të punonjësve të policisë dhe kushdo që do të shkelë ligjin do të ndëshkohet me masën më të rëndë disiplinore, deri në përjashtim nga radhët e Policisë së Shtetit", tha Prenci.
Ai kërkoi gjithashtu forcimin e luftës së policisë për të parandaluar kultivimin e bimëve narkotike, duke theksuar se më problematike gjendja paraqitet në zonën e lumit të Vlorës dhe Lazarat, në rrethin e Gjirokastrës.
Pavarësisht se ky është vit zgjedhor, theksoi Prençi gjatë takimit, "në këto dy qarqe, por edhe në qarqe të tjera ku vitin e kaluar është konstatuar kultivim i bimëve narkotike, të merren masa që të mos lejohet kultivimi i bimëve narkotike", duke garantuar ndërkohë mbështetje për të luftuar këtë fenomen.
Ai vlerësoi drejtuesit e policisë për angazhimin në realizimin e detyrimeve të saj në procesin e anëtarësimit të Shqipërisë në NATO dhe i informoi ata për vlerësimet pozitive të ekspertëve të huaj, të ardhur nga BE, për të monitoruar procesin e liberalizimit të vizave. 
Ndërkohë, Prençi kërkoi nga drejtuesit e drejtorive të bëjnë transparencë të plotë të të gjithë veprimtarisë së policisë në luftë kundër krimit dhe shkelësve të ligjit.