KUKËS: ÇELEN DY EKSPOZITA TË FOTOGRAFËVE KOSOVARË

Dy ekspozita fotografike, të hapura në mjediset e pallatit të kulturës "Hasan Prishtina" të qytetit të Kukësit, u kanë paraprirë festimeve përkujtimore me rastin e eksodit biblik të kosovarëve të dëbuar me dhunë nga trojet e tyre prej forcave ushtarake e paramilitare serbe në pranverën e vitit '99.
Ekspozitat, të cilat po vizitohen nga banorët e Kukësit, si dhe nga  mijëra kosovarë që kanë mbërritur sot në këtë qytet, u bëjnë jehonë ngjarjeve të asaj pranvere.       
Habib Zogaj, autor i njërës prej ekspozitave, ish- fotoreporter i "Kosova e lirë" dhe "Kosova press" thotë se të 47 fotografitë e paraqitura në ekspozitën e tij  janë kryer në fshehtësi e në kushte mjaft të vështira. Si ish- luftëtar i UÇK-së, tashmë invalid, ai shprehet se "përmes fotografive unë dua të tregoj të vërtetën e atyre ditëve, të tregoj vuajtjet e masakrat e kryera nga ushtria e paramilitarët serbë". 
Ndërkohë, rreth 25  fotografitë e forografi Jonuz Kola, njëkohësisht drejtor ekzekutiv i shoqatës "Viktimat e minave e armëve", kanë marrë spunto nga vuajtjet e kosovarëve ndërsa hynin në Shqipëri. 
Aktivitetet në qytetin e Kukësit, nën moton "Eksodi '99 - marshimi 2009", pritet të vazhdojnë me veprimtari të tjera sportive e kulturore