DURRËS: OPERACIONI “PASTICIERI”, NË PRANGA EDHE NJË POLIC

Një punonjës i Policisë u ndalua sot nga kolegët e tij të Durrësit, në vijim të operacionit policor ndaj shitësve të lëndëve narkotike.
Burime zyrtare nga drejtoria e Policisë së qarkut, bënë të ditur për ATSH-në se: “shtetasi Arif Konja, 47 vjec, lindur dhe banues në Rrogozhinë, me detyrë efektiv i policisë së burgut në këtë qytet është prangosur, nën akuzën e “prodhimit dhe shitjes së lëndëve narkotike”. 
Burimet bënë të ditur se në vijimësi të operacionit të koduar “Pastiçieri”, mesnatën e kaluar në afërsi të pallatit të Sportit në Durrës, ishte ndaluar shtetasi Besnik Tarko, 39 vjec, lindur në Lushnjë dhe banues në lagjen 7 të Durrësit, të cilit iu gjetën dhe sekuestruan 16 gram lëndë narkotike e llojit heroinë. Gjatë dëshmisë, Tarko deklaroi se drogën ia kishte blerë 47-vjecarit nga Rrogozhina, Konja, i cili u ndalua sot parasdite.
Ditët e fundit në kuadër të operacionit “Pastiçieri”, forcat e policisë së Durrësit kanë ndaluar 6 persona dhe kanë sekuestruar rreth 100 gram heroinë të përgatitur për shitje.