KRYEPESHKOPI ANASTAS URON BESIMTARËT ORTODOKSË PER PASHKËT 2009

Mesazhe paqe dhe dashurie, janë në qendër të urimit, që Anastasi, Kryepiskop i Tiranës, Durrësit dhe i gjithë Shqipërisë, u uron sot, në vigjilje të Pashkëve, të gjithë besimtarët ortodoksë shqiptarë.
Në mesazhin për Pashkët 2009, kryepiskopi ka zgjedhur pjesën biblike, ku ftohen besimtarët që të mos kenë frikë. 
"Mesazhi i Ngjalljes predikon në mënyrë diakronike lirinë nga çdo gjë që shkakton frikë", . thuhet në këtë mesazh urimi.
Më tej ai vijon "Në epokën tonë janë shumuar frikërat që kërcënojnë jetën tonë. Madje, kohët e fundit janë acaruar edhe për shkak të vuajtjeve që shkakton kriza ekonomike në tërë planetin. Fobi të reja dhe të vjetra qarkojnë mendjen tonë dhe na e shtrëngojnë zemrën. Brenda kësaj atmosfere të nderë vjen e kremtja e Ngjalljes që të ftojë çdo besimtar në një rrugëtim lirie nga frika. Nga frika e atyre që janë armiqtë tanë. Nga frika që krijon padrejtësia dhe egërsia e shoqërisë sonë. Nga frika e mëkatit shumëformësh që depërton në qenien tonë dhe na e tjetërson. Nga frika e dhimbjes, e varfërisë, e sëmundjes, e vetmisë, e rreziqeve dhe hidhërimeve që kërcënojnë jetën tonë. Nga frika e problemeve të mprehta të jetës së përditshme. Nga frika e së panjohurës, e dështimit, e pasigurisë për të ardhmen". 
Në përfundim, Anastasi, Kryepiskop i Tiranës, Durrësit dhe i gjithë Shqipërisë, shprehet se "Kulmi i mesazhit të Ngjalljes së Krishtit është çlirimi nga frika e vdekjes, e vdekjes sonë dhe e njerëzve tanë të afërm, frikë që na e ndrydh jetën. E kremtja e Ngjalljes nuk shpall thjesht një lajm, por na fton të marrim pjesë në lirinë, që na fali Krishti".