PRESIDENTI TOPI URON TE GJITHE BESIMTARET ORTODOKSE ME RASTIN E FESTES SE PASHKEVE

Presidenti i Republikës, Prof. Dr. Bamir Topi, nëpërmjet një mesazhi dërguar Kryepeshkopit të Tiranës, Durrësit dhe të gjithë Shqipërisë, Fortlumtërisë së Tij, Anastasios Janullatos, u përcjell urimet më të ngrohta dhe të përzemërta në ditën e festimit të Pashkëve, të gjithë besimtarëve ortodoksë shqiptarë kudo ku ndodhen.
“I nderuar Fortlumtëria Juaj Anastasios Janullatos,
Të nderuar besimtarë ortodoksë të Shqipërisë!
Në atmosferën e gëzueshme të Festës së Pashkëve, ndihem pranë jush dhe pranë çdo besimtari e familjeje, që pret me mirësi dhe shpresë ditën kremtuese të ringjalljes së Krishtit, për t’Ju përcjellë urimet më të përzemërta për paqe, harmoni e shpresë për të ardhmen.
Në këtë ditë të ringjalljes së shpresës pas sakrificës, përjetojmë ngadhnjimin e përjetshëm mbi vdekjen dhe kemi rastin të lutemi për më shumë dashuri për njëri-tjetrin e për familjet tona, në kërkim të një dimensioni akoma më të lartë të tolerancës e të bashkëjetesës, në të mirë të Atdheut tonë e të qytetarëve të tij kudo ku ndodhen.
Gëzuar e përshumëvjet Pashkët!
Zoti i bekoftë të gjithë shqiptarët kudo ku ata jetojnë e punojnë!” – përfundon mesazhi i Presidentit të Republikës drejtuar besimtarëve ortodoksë shqiptarë