AGJENCIA "ONUFRI VOYAGE" SJELL NE SHQIPERI 80 TURISTE FRANCEZE

Një grup prej 80 turistë francezë, mes të cilëve, një grup i Shoqatës A.D.H.E të Universitetit të Sorbonës në Paris, (Francë), përfaqësues të kompanive të ndryshme të biznesit francez, historianë, arkeologë, personalitete të njohur francezë në fushat ekonomike, etj, kanë nisur vizitën e parë turistike nëpër Shqipëri, ofruar nga agjencia turistike, "Onufri Voyage", me qëndra në Shqipëri dhe Francë.   
Nisur nga pjesëmarrja në grup e personaliteteve të fushave ekonomike franceze, si ish-ministri i Ekonomisë, Francis Mer, profesorët e Ekonomisë, Jacques Marseille dhe Michel Godet, etj, agjencia "Onufri Voyage", do të organizojë të martën një takim, me temë "Kriza e sotme botërore dhe Shqipëria", me pjesëmarrjen e intelektualëve, profesorëve, shoqatës së frankofonisë, etj.      
Presidenti i agjencisë "Onufri Voyage", Gazmend Toska, biznesmen shqiptar që zhvillon disa aktivitete private prodhuese, kryesisht në industrinë e tekstilit në Francë, i tha sot ATSH-së, se përmes tureve turistike Shqipëri-Francë dhe anasjelltas, synon t'u bëjë të njohur Shqipërinë francezëve, jo vetëm për vlerat e mëdha arkeologjike, historike, por dhe mundësitë për zhvillimin e bizneseve në fusha të ndryshme.  
Në kuadër të turit turistik, grupi francez do të udhëtojë drejt Beratit, Shkodrës, Durrësit, Apollonisë, Gjirokastrës, etj