KRYEMINISTRI BERISHA REAGON PAS VENDIMIT TË GJYKATËS PËR KRYEBASHKIAKUN E HIMARËS, VASIL BOLLANO

Kryeministri Sali Berisha ka reaguar pas vendimit të sotëm të Gjykatës së Vlorës për heqjen e të drejtës politike dhe elektorale ndaj Kryetarit të Bashkisë së Himarës, zotit Vasil Bollano.
"Kryeministri Berisha, duke mbetur gjithmonë shumë i ndjeshëm ndaj respektimit dhe garantimit të të drejtave dhe lirive të çdo qytetari, si dhe për respektimin e plotë të pavarësisë së sistemit gjyqësor, mendon se interpretime dhe zbatime të ligjeve që mund të mbartin nuanca politike dhe arkaike nuk i shërbejnë qëllimit të vendosjes së ligjit”, thuhet në një njoftim të publikuar sot në mbrëmje në faqen zyrtare të qeverisë.
Kryebashkiaku Vasil Bollano u dënua sot nga gjykata e rrethit të Vlorës me 6 muaj burg dhe 500 mijë lekë gjobë, për shpërdorim detyre. Sipas gjyqtarit, Shkëlzen Selimi, nga vlerësimi i provave rezulton se Bollano ka shpërdoruar detyrën e tij publike duke urdhëruar heqjen dhe çmontimin e sinjalistikës rrugore, në segmentin Llogora-Qeparo, pjesë e rrugës kombëtare Vlorë-Sarandë. Sipas tij, nga dy urdhëra të lëshuara prej z. Bollano janë dëmtuar interesat shtetërore, e shoqëruar kjo me një dëm financiar prej rreth 1.8 milionë lekësh. Gjatë fazës së hetimit, Bollano e ka argumentuar urdhrin e tij me faktin se për vendosjen e këtyre tableave nuk ishte marrë leje nga bashkia. Vasil Bollano është zgjedhur në krye të bashkisë së Himarës, për dy mandate radhazi.