SHQIPËRIA E HAPUR PËR INVESTIME

Unioni i Dhomave të Tregtisë dhe Industrisë hapi sot padite në Pallatin e Kongreseve në Tiranë, Panairin e Biznesit Gjerman, nën siglën "Shqipëria e Hapur për Investime". 
Në ceremoninë e hapjes së edicionit të parë ishin të pranishëm ministri i Ekonomisë, Tregtisë dhe Energjetikës, Genc Ruli, Ambasadori i Republikës Federale të Gjermanisë në Tiranë, Bernd Borchardt, President i  i Unionit të  Dhomave të Tregtisë dhe Industrisë, Ilir Zhilla, përfaqësues të biznesit, sipërmarrës dhe të ftuar të tjerë. Në këtë panair marrin pjesë më shumë se 39 kompani gjermane të fushave të ndryshme, përfaqësues të industrisë së makinave, ndërtimit, mjekësisë, farmaceutikës, ushqimeve, këpucëve, etj.     
Ministri Ruli e vlerësoi këtë panair si një mundësi reale të prezantimit të potencialeve të vendit për thithjen e investimeve të huaja, të gjithë projekteve të realizuara dhe atyre që janë në proçes apo në rrugën e zbatimit midis qeverive dhe bizneseve të të dy vendeve. Sipas tij, organizimi i këtij aktiviteti, sot në kushtet e krizës financiare ndërkombëtare, tregon më së miri për perspektivën e bashkëpunimit midis dy vendeve. 
Ndërsa Ambasadori Borchardt vlerësoi se ky aktivitet tregon interesin në rritje që ka biznesi gjerman për të rritur prezencën e tij në Shqipëri, përmes bashkëpunimit konkret në sektorë strategjikë dhe potencialë të Shqipërisë si energjetikë, industri, etj. 
Për Presidentin e Unionit të  Dhomave të Tregtisë dhe Industrisë, Ilir Zhilla,  ky panair do të kthehet në një traditë, perspektiva e të cilit do t'i shërbejë zhvillimit të biznesit dhe bashkëpunimeve të frytshme midis dy vendeve. Në të njëjtën kohë organizimi i këtij aktiviteti ka gjetur edhe mbështetjen e Ambasadës Gjermane në Tiranë, Dhomës Gjermane të Tregtisë (DIHA) dhe Ministrisë së Ekonomisë Tregtisë dhe Energjitikës. 
Firmat pjesëmarrëse janë jo vetëm ato që ushtrojnë aktivitetin në vendin tonë, por dhe shumë të tjera që kërkojnë të hyjnë në të, si në fushën e veshjeve, pijeve, farmaceutikës dhe ndërtimit. Gjatë dy ditëve të këtij evenimenti, do të organizohen konferenca dhe takime 'Be to Be', që do të përcjellin për një audiencë të gjerë nismat dhe njohjet konkrete të bashkëpunimit midis biznesit shqiptar dhe atij gjerman.
Një vend të rëndësishëm do të zërë tema "Roli i reformës rregullatore në përmirësimin e klimës së biznesit dhe investimeve", sfida për zhvillimin e konkurrueshëm së produkteve dhe shërbimeve, etj.   
Gjermania renditet si një ndër partnerët e rëndësishëm tregtarë me Shqipërinë, ku vend kryesor zënë importet e mallrave me këtë vend. Sipas të dhënave të publikuara së fundi nga Instituti i Statistikave (INSTAT), gjatë vitit 2008 importet shënuan vlerën e 17 miliard e 771 milionë lekëve. Vendin kryesor e zënë makineritë dhe pajisjet, ndërsa eksportet me Gjermaninë për këtë periudhë arritën në 2 miliardë e 47 milionë lekë.
Referuar të dhënave nga Ministria e Ekonomisë, gjatë 20 viteve të fundit Republika Federale e Gjermanisë ka financuar projekte të shumta në Shqipëri për zhvillimin ekonomik dhe social. Sipas burimeve nga zyra e Bankës për Zhvillim KfW në Tiranë, qeveria gjermane është aktive prej dy dekadash në Shqipëri në sektorë strategjikë të ekonomisë, si atë të furnizimit me ujë të pijshëm dhe me energji elektrike, por edhe në mbështetjen e ndërmarrjeve të vogla dhe të mesme.
Në kuadër të marrëdhënieve dy a shumëpalëshe, Gjermania ka kontribuar për Shqipërinë gjatë 20 viteve të bashkëpunimit me rreth 800 milion euro, shumë e cila për frymë të popullatës është më e madhja që ky shtet i ka dhënë një vendi tjetër në botë.