TREGU ME PAKICË I LETRAVE ME VLERË 3 MUJORIN E PARË TË VITIT U DOMINUA NGA BONOT E THESARIT

Tregu me pakicë i letrave me vlerë të qeverisë gjatë 3 mujorit të parë të vitit 2009 u dominua në masën 98.06% nga transaksionet në instrumenta afatshkurtër (bono thesari) dhe 1.94% nga instrumenta afatgjatë (obligacione).
Të dhënat statistikore të Autoritetit të Mbikqyrjes Financiare mbi tregun me pakicë të letrave me vlerë të qeverisë për periudhën janar - mars 2009, flasin për një dominim të transaksioneve "Blerje në tregun primar" dhe "Shitje nga portofoli i ndërmjetësit financiar" përkatësisht me 36.86% dhe 34.36% kundrejt volumit të përgjithshëm.
Referuar të dhënave të mësipërme për nga numri i transaksionit, sipas llojit të investitorëve, individëve apo persona juridikë, shihet se në peshë specifike më të lartë janë investitorët individë me 98.20 % të totalit të transaksioneve në këtë treg.
Transaksioni i llojit "shitje nga portofoli i ndërmjetësit financiar" ka pësuar një ulje prej 547 milionë lekë ose 17.87%, krahasuar me të njëjtën periudhë të vitit 2008. Po kështu, numri i transaksioneve të këtij lloji ka pësuar një ulje prej 12.73%.
Ndërkohë, transaksioni i llojit "blerje nga individët para afatit të maturimit" gjatë 3-mujorit të parë të vitit 2009 ka pasur një rritje prej 14 milionë lekë ose 90.41% krahasuar me periudhën janar - mars 2008, ndjekur nga një rritje në masën 26% të numrit të transaksioneve.
Krahasuar me të njëjtën periudhë të vitit 2008, vihet re një rënie në vlerë absolute e totalit të transaksioneve me rreth 454 milion lekë.