TURQIA RIANGAZHOHET PËR ANËTARËSIMIN NË BASHKIMIN EVROPIAN

Negociatori i Turqisë me BE-së deklaroi sot se Ankaraja do të çonte përpara reformat e zvarritura për anëtarësimin në bllokun 27-anëtarësh, përfshi reformat për taksat dhe amendimet e kushtetutës, ndërkohë që vendi ka përpara një periudhë 2-3 vjeçare deri në zgjedhjet e ardhshme.
Turqia ka nisur bisedimet e anëtarësimit në vitin 2005, por progresi i tyre ka qënë i ngadaltë.
BE-ja kërkon që Turqia të vazhdojë me zbatimin e reformave të dhimbshme, përfshi edhe kufizimin e pushtetit të ushtrisë, përmirësimin e lirisë së fjalës dhe garantimin e më shumë të drejtave për pakicat, por Ankaraja ka deklaruar se zgjedhjet dhe problemet e brendshme kanë shpërqëndruar përpjekjet për kryerjen e këtyre reformave.
"Kemi një periudhë 2-3 vjeçare pa zgjedhje dhe ky është një moment thelbësor për kryerjen e reformave", u deklaroi Egemen Bagis ambasadorëve të BE-së gjatë një dreke pune në Ankara.
"Qëllimi dhe synimi ynë themelor është anëtarësimi në bllok me të drejta të plota, asgjë më shumë dhe asgjë më pak se kjo, dhe jemi tepër të vendosur për zbatimin e reformave", shtoi Bagis.
Turqia është zotuar disa herë për përshpejtimin e reformave të nevojshme, por Brukseli ka deklaruar se kërkon të shohë vepra konkrete dhe jo vetëm premtime.
Bagis deklaroi se qeveria e kryeministrit Tayyip Erdogan do të dërgojë në parlament një projektligj për amendimin e një kushtetute të propozuar nga ushtria në vitin 1982, që përbën një hap themelor drejt anëtarësimit në BE.
Kushtetuta, e hartuar pas një grushti shteti në vitin 1980, është cilësuar si shkaku kryesor që pengon modernizimin e Turqisë dhe zhvillimin e saj ekonomik. Kjo kushtetutë kufizon disa të drejta politike dhe i lejon ushtrisë të ushtrojë një ndikim të madh mbi qeverinë e vendit.
Bargis deklaroi gjithashtu se Turqia planifikon fillimin së shëejti të punës për reformin e sistemit gjyqësor, sistemit të taksave, arsimit dhe të sektorit të energjisë për t'i sjellë ato pranë standarteve të BE-së.
Komisioneri evropian për Zgjerimin, Olli Rehn ka deklaruar se viti 2009 do të jetë "letra e lakmusit për Turqinë" për të treguar gatishmërinë e vendit të madh mysliman për t'u anëtarësuar në bllokun 27-anëtarësh.