DICK CHENEY: METODAT E MARRJES NË PYETJE TË TË BURGOSURVE NË KOHËN E BUSHIT KANË SHPËTUAR MIJËRA JETË

Ish-zëvendëspresidenti amerikan, Dick Cheney, mbrojti edhe njëherë sot teknikat e marrjes në pyetje të të burgosurve të ngjashme me torturën të praktikuara në kohën e administratës Bush tek të dyshuar për terrorizëm, duke u shprehur se ato kishin "shpëtuar mijëra jetë".
"Jam i bindur, absolutisht i bindur, se kemi shpëtuar mijëra, ndoshta madje edhe qindra mijëra jetë", deklaroi Cheney në televizionin CBS,duke theksuar, siç ka bërë edhe më parë, se rrjeti terrorist Al-Kaida ishte i gatshëm të sulmonte një qytet amerikan me një predhë bërthamore.
Një nga vendimet e para të marra nga Barak Obama si president i Shteteve të Bashkuara ka qenë ndalimi i metodave të marrjes në pyetje me forcë të të burgosurve të miratuara nga pararendësi i tij, George W. Bush dhe të ngjashme me torturën, si simulimi i mbytjes.
Administrata Obama publikoi në fund të prillit disa urdhëresa të brendshme të hartuara në vitet 2002 dhe 2005 nga juristë të Departamentit të Drejtësisë, që i jepnin CIA-s argumentat juridike për të ushtruar ndaj terroristëve të dyshuar trajtime që mendohej se i bënin të tregonin.
Por Cheney kërkon që të publikohen edhe dy urdhëresa që, sipas tij, tregojnë se këto seanca pyetësore i kanë bërë të mundur CIA-s të pengojë akte terroriste.
"Këto urdhëresa ekzistojnë, unë i kam parë, madje i kam patur në dosjet e mia në një moment të caktuar", deklaroi sot Cheney. "Nuk është përfshirë gjithçka në Arkivat kombëtare, jam i sigurt se CIA ka kopje të këtyre elementëve".
"Nëse duhet ta zhvillojmë këtë debat" për përdorimin e metodave të shumëpërfolura të marrjes në pyetje, "ai duhet të jetë i plotë. Njerëzit duhet të mund t'i shohin këto urdhëresa dhe gazetarët mund të vlerësojnë se çfarë kemi arritur të bëjmë ne", bëri të ditur ai.
Këto urdhëresa "flasin në detaje për atentate të ndryshme që ishin planifikuar dhe për mënyrën se si ato janë penguar", si dhe për "volumin e zbulimit të arritur në këtë mënyrë", këmbënguli ai