BULLGARI - KRIMINALITETI I TREFISHUAR PAS KRIZËS EKONOMIKE

Përqindja e kriminalitetit në Bullgari është trefishuar brenda një viti për arsye të krizës ekonomike dhe kjo tendencë pritet të theksohet, sipas një studimi të pavarur të paraqitur sot në Sofje. 
"Viktimat e krimit janë trefishuar në janar dhe shkurt në krahasim me të njëjtën periudhë të vitit 2008, sepse kriza krijon tensione", nënvizoi Tikhomir Bezlov i Qendrës së Studimit të Demokracisë, një institut reference. 
Tendenca është përvijuar që vitin e kaluar, me një rritje prej shtatë për qind të vjedhjeve dhe grabitjeve në krahasim me 2007-n, theksoi ai. 
Statistikat zyrtare flasin gjithsesi për një rënie me 5,5 për qind të krimit në 2008, me 113 340 krime dhe shkelje të regjistruara, ose një numër prej 1 483 rastesh për 100 000 banorë.
 Por sipas Qendrës së Studimit të Demokracisë, që e vlerësoi në 520 000 numrin e krimeve dhe shkeljeve të kryera realisht, vetëm një pjesë e tyre janë njoftuar dhe regjistruar. 
Një drejtues i lartë i Ministrisë së Brendshme, komisari i përgjithshëm Pavlin Dimitrov, e pranoi "një mungesë besimi tek policia dhe sistemi juridik, që vlerësohet si tepër i ngadalshëm", megjithë reformat e nisura pas hyrjes së Bullgarisë në Bashkimin Evropian në 2007-n.  
Ai e pranoi gjithashtu  se "një rritje e vjedhjeve dhe grabitjeve shoqëron në përgjithësi krizat ekonomike, sepse "papunësia prek shpesh qarqet më të ndjeshme për të kryer krime" .