ZOELLICK: BOTA PËRBALLET ME KËRCËNIMIN E KRIZËS SOCIALE

Rimëkëmbja e ekonomisë botërore do të jetë e ngadaltë dhe papunësia në rritje mund të jetë shkaktare e krizave sociale dhe aplikimit të politikave proteksioniste, deklaroi sot presidenti i Bankës Botërore, Robert Zoellick në një intervistë për gazetën "El Pais".
"Ajo që filloi si një krizë e madhe financiare dhe u shndërrua në një krizë të rëndë ekonomike tani po kthehet në një krizë të madhe të papunësisë, dhe, nëse nuk marrim masa të menjëhershme, ekziston rreziku i një krize edhe më të rëndë humanitare dhe sociale", paralajmëroi kreu i Bankës Botërore.
"Ky do të ishte një terren i mirë për forcimin e populistëve dhe lindjen e politikave proteksioniste", shtoi ai.
"Ministrat e Financave të G7-ës dhe G20-s po paraqesin një ngadalësim ngushëllues të rënies ekonomike. Megjithatë, sërish bota mund të njohë një rritje shumë të ngadaltë ekonomike dhe situata do të ishte më pak e rëndë", vlerësoi Zoellick.
"Por ekonomistët dhe industrialistët janë të ndërgjegjshëm se rimëkëmbja ekonomike do të jetë e ngadaltë dhe më e dobët se sa pritej", deklaroi ai, duke shtuar se ende ekzistojnë rreziqe ndaj sistemit financiar amerikan dhe tregjeve jo të fuqishme të vendeve në zhvillim.