KOSOVA FESTON NJËVJETORIN E HYRJES NË FUQI TË KUSHTETUTËS

Kosova feston sot njëvjetorin e hyrjes në fuqi të Kushtetutës, që e përcakton “shtet i pavarur, sovran, demokratik, unik dhe i pandashëm”.

Parlamenti i shtetit të ri pasi ka shpallur pavarësinë më 17 shkurt 2008, më pak se dy muaj më vonë, më 9 prill, ka miratur Kushtetutën, e cila ka hyrë në fuqi në 15 qershorin e para një viti.

Gjithë ky proces, shpallja e pavarësisë, miratimi e hyrja në fuqi e Kushtetutës, përfshirë edhe miratimin e mëse 50 ligjeve me procedurë të veçantë, bazohet në Propozimin Gjithëpërfshirës të ish-të dërguarit të posaçëm të OKB-së, kryenegociatorit për statusin, Martti Ahtisaari, i cili po sot pritet në Prishtinë.
Kushtetuta, që sot mbush një vit nga hyrja në fuqi, ka pasuar Kornizën Kushtetuese të kohës së administratës së UNMIK-ut, pas përfundimit të luftës së para 10 viteve.
Por, Kosova ka një traditë më të hershme kushtetuese.

Me Kushtetutën e vititi 1974 Kosova ishte njësi konstituive e federatës me të drejtë vetoje.      
Kushtetuta tjetër ishte ajo e Republikës së Kosovës, e miratuar në vitin 1991, e cila pasonte deklaratën e pavarësisë të 2 korrikut të po atij viti, të Kuvendit të Kosovës, por që nuk pati njohje ndërkombëtare. 
Interesante është historia kushtetuese e Kosovës në këto 34 vitet e fundit. 
Kujtojmë faktin se, si njësi federale e ish-Jugosllavisë, Kosova ka pasur Kushtetutë prej vitit 1974, e cila i ka siguruar mëvetësi maksimale organizative dhe të drejtë vetoje në nivelin federal, ashtu si edhe njësive të tjera. 
Në vitin 1991, në rrethana të pushtimit, Kosova ka miratuar Kushtetutën e Republikës së Kosovës, e cila, ndonëse e pafuqizuar plotësisht, ka parashtruar funksionimin e organizimit të shtetit tonë në kohën e asaj që njihet në botë si ‘shteti paralel i shqiptarëve të Kosovës’ për pothuaj një dekadë. 
Republika e Kosovës, para një viti, në ditën e hyrjes në fuqi të Kushtetutës kishte njohjen e  43 shteteve, ndërsa sot është e njohur nga 60 shtete të botës, anëtare të OKB-së, është anëtarësuar në Fondin Monetar Ndërkombëtar dhe në Bankën Botërore, ndërsa pret njohje të reja. 
Sipas medias kosovare, ambasadori i Britanisë së Madhe në Beograd, Stephen Wordsworth është shprehur qartë për median serbe se Kosova është çështje e mbyllur dhe se bisedime për statusin e Kosovës nuk do të ketë më. 
“Kosovën e kanë njohur 60 për qind e shteteve të OSBE-së, 70 për qind e shteteve të Këshillit të Europës dhe 80 për qind e shteteve anëtare të Bashkimit Europian”, ka theksuar  Wordsworth për median serbe.