KOSOVA NIS PROMOCIONIN TURISTIK NË TIRANË

-Vetëm një javë pas inaugurimit të autostradës destinacionet turistike kosovare pritet të zbresin në Tiranë- 

Kur projekti me gjigant i qeverisë shqiptare, autostrada Durrës-Kukës-Morinë pritet të inaugurohet vetëm pas dy ditësh, destinacionet turistike kosovare do të nisin rrugën drejt Tiranës, në  panairin turistik "Bashkohuni në fundjavë dhe përjetoni Kosovën". 
Unioni i Operatorëve Turistikë Shqiptarë, në bashkëpunim me Organizatën Turistike "KOTAS" Kosovë, e mbështetur nga USAID Kosovë, do të jetë bashkëorganizator i aktivitetit promocional turistik "Bashkohuni në fundjavë, përjetoni Kosovën", si një panair i destinacioneve turistike kosovare për  ture turistike, i cili do të zhvillohet në Tiranë në datat 1 dhe 2 korrik.
Sipas kreut të UOTSH-it, Sadik Malaj, në këtë aktivitet do të ketë një pjesëmarrje e përfaqësim masiv e dinjitoz të resurseve turistike kosovare të maleve të Sharit, Rrafshit të Dukagjinit, Rrafshit të Kosoves, Malësisë së Gjakovës etj. "Gjatë panairit promovues të biznesit turistik të Kosovës do të krijohen mundësitë për t'u njohur me të e për të marrë çmime e oferta për grupet turistike të tureve turistike si dhe për organizime turistike fundjavash", deklaroi Malaj.
Malaj theksoi se panairi synon vendosjen e bashkëpunimit me partnerët turistikë nga qytetet kryesore të Shqipërisë dhe nga jashtë, qytetarët shqiptarë me banim në qytetet më të mëdha, si Tirana, Durrësi, Shkodra,Vlora, etj, komuniteti ndërkombëtar që jeton dhe punon përkohësisht në Shqipëri, por edhe klubet shqiptare dhe ndërkombëtare, bizneset bankare, klubet dhe ekipet sportive.
Për rritjen e bashkëpunimit mes operatorëve të dy vendeve Malaj vlerësoi si faktor kryesor edhe lehtësitë e krijuara nga ndërtimi i autostradës Durrës-Kukës-Morinë. 
Autostrada, projekti më i madh në Shqipëri, është me 4 korsi, 2 korsi në çdo drejtim. Ndërtimi i saj përfshiu edhe dy tunele paralele me nga 5.5 km, njëri prej të cilëve tashmë është funksional, por edhe 29 ura. Afro 4.5 km rrugë është mbi ura dhe struktura deri në 80 m lartësi. Autostrada do të lidhë bregdetin shqiptar me Kosovën, duke reduktuar ndjeshëm kohën e udhëtimit në këto destinacione në krahasim me rrugët egzistuese, krijon kushtet për një lëvizje me shpejtësi 80-100 km/orë, duke realizuar lidhjen e Morinës (Kosovës) me Durrësin për vetëm 2 orë e 30 minuta në kushte krejt normale, madje edhe në periudhat e dimrit