FUTBOLL: VLLAZNIA E SHKODRËS, PËSON HUMBJE TË THELLË NË VIENË

llaznia e Shkodrës, ka humbur me rezultatin e thellë 5-0 ndaj Rapid të Vienës, ndeshje e luajtur mbrëmjen e së enjtes në stadiunim “Grehard Hannapi" në Vienë, e vlefshme për turin e dytë të Ligës Europiane në futboll. 
     Pjesa e parë  e këtij takimi, i cili u ndoq edhe nga rreth 200 tifozë shkodranë, u mbyll me rezultatin 1-0 pas një goli të shënuar  për Rapid në minutën e 33-të nga Hofmann. 
     Deri në minutën e 68-të loja kishte një farë ekuilibri, me sulme të ndërsjellta në të dy portat respektive. Por, pikërisht në këtë minutë, një gabim fatal në dalje i portjerit të Vllaznisë Olti Bishani i ka kushtuar shumë rëndë Vllaznisë duke u ndëshkuar me golin e dytë të shënuar nga Jelavic.
     Tre minuta më pas vienezët e Rapidit, shënuan edhe golin e tretë me të njëjtin autor duke e thelluar avantazhin në tre me zero.
      Dy minuta pas pësimit të golit të tretë, Vllaznia i kishte të gjitha mundësitë që ta rihapte takimin, por mungesa e eksperiencës e të riut  Bala bëri që ai të humbë dy herë radhazi një rast të pastër shënimi vetëm për vetëm me portjerin austriak Payer. 
     Ndërkohë austriakët e Rapidit, shënuan në minutën e 82-të golin e tretë me anë të Trines si dhe në të 85-tën me anë të Hoffer duke fiksuar në mbyllje të 90-të minutave rezultatin e thellë 5 me 0 për Rapidin. 
     Pas ndeshjes, trajneri i Vllaznisë Hasan Lika duke komentuar ndeshjen është shprehur i pakënaqur nga paraqitja e futbollistëve të tij, sidomos në minutat e pjesës së dytë. 
     Ai ka  fajësuar portjerin e Vllaznisë Bishani, i cili me një dalje të gabuar në minutën e 68-të ndëshkoi Vllazninë, moment  kur loja ka marrë një rrjedhë te gabuar në dëm të shkodranëve.
     “Ne u mundëm nga gabimet tona”, theksoi trajneri i Vllazisë Hasan Lika në një prononcim për median pas ndeshjes.
      Sipas tij, edhe pse vendasit kishin më tepër iniciativë për të rrezikuar portën shkodrane, kurrsesi, rrezultati nuk duhet të fiksohej aq i thellë.
      Shifra e thellë 5 me 0, për teknikun Lika është krejt e vështirë të përmbyset në ndeshjen e kthimit, atë që do të luhet në stadiumin “Loro Borici” të Shkodrës me datë 23 korrik