BESART BERISHA MENDON PËR LARGIMIN NGA KOMBËTARJA

Sulmuesi shqiptar, Besart Berisha, i cili sapo ka nënshkruar një kontratë 3 vjeçare me Arminia Bielefeldin e kategorisë së dytë gjermane, është lënë jashtë listës së 20 lojtarëve të  përzgjedhur nga trajneri i Kombëtares shqiptare, Josip Kuzhe për miqësoren e së mërkurës ndaj Qipros.  
Këtë fakt futbollisti e nuk e ka pritur mire dhe ka deklaruar për gazetën gjermane “Bild” se mund të lërë kombëtaren shqiptare.
“Nëse trajneri Josip Kuzhe, ose presidenti Armando Duka nuk kontaktojnë me mua për arsyet e lënies jashtë miqësores me Qipron, unë do të mendoj seriozisht për t’u larguar nga Kombëtarja. Nuk e kam përkrahjen e duhur dhe nuk jam lojtar që një herë të thirrem e një herë jo”, ka deklaruar futbollisti.
Berisha së bashku me Edmond Kapllanin nuk u ftuan nga tekniku kroat. Kapllani, sulmues i Augsburgut është kontaktuar nga Kuzhe, ndërsa për Berishën Kuzhe kishte thënë se do ta kontaktonte gjatë fundjavës. 
“Nuk jam kontaktuar nga askush dhe nuk i di arsyet pse nuk jam ftuar. Jam shumë i zhgënjyer për këtë vendim të Kuzhes, pasi në këto çaste jam kthyer në formën e vjetër dhe përfundimisht kam arritur 100 përqindëshin tim, pas lëndimit të pësuar 2 vjet më parë”, shtoi 24 vjeçari. 
Të mërkurën, Shqipëria do të ndeshet me Qipron në miqësoren që do të luhet në “Qemal Stafa”, në prag të sfidave kualifikuese për Botërorin 2010 ndaj Danimarkës dhe Suedisë në shtator.