Në kaskadën mbi lumin Drin prurjet janë drejt rënies dhe situata po stabilizohet

Drejtori i kabinetit në Ministrinë e Ekonomisë, Tregtisë dhe Energjetikës, Z. Ilir Ciko deklaroi sot se është duke u stabilizuar situata dhe se ka tendencë në zvogëlim të prurjeve në kaskadën e lumit Drin.
Z. Ciko tha gjithashtu se në Hidrocentralin e Vaut të Dejes shkarkimet kanë rënë nën 2000 m3/sek, aktualisht janë 1900 m3/sek, ndërsa prurjet në hidrocentralin e Fierzës maten rreth 650 m3/sek që do të thotë se kanë tendencë rënie.
Sipas tij, tashmë strukturat e METE-s ndodhen në terren për të ndihmuar me mjetet e nevojshme financiare banorët e prekur nga përmbytjet në Shkodër, ndërsa shtoi se në këtë drejtim një kontribut të madh po jep edhe biznesi. "Ne kemi vënë në dispozicion të zonave të përmbytura edhe repartin e inspektim shpëtim të minierave që është një strukturë e specializuar për ndërhyrje në raste të tilla", deklaroi Z. Ciko, ndërsa ftoi biznesin për t'i ardhur më tepër në ndihmë banorëve të këtyre zonave.
Gjithashtu, Ciko bëri të ditur edhe kontributin e dhënë nga kompania ALBPETROL, e cila ka dhuruar 25 milion lekë si dhe të gjitha mjetet e punës e nevojshme për të pëballuar situaten e emergjences ne zonat e permbytura.
Një kontribut, sipas Cikos, ka dhënë edhe kompania OSSH në shumën 10 milionë, lekë. Por, ai shtoi se edhe kompani të tjera private kanë kontribuar në llogarinë bankare të hapur nga qeveria.
"Çdo kontribut është me vlerë dhe shkon në ndihmë të drejtpërdrejtë të banorëve në zonat e përmbytura. Jemi të vendosur për të ndihmuar të gjithë banorët në këtë drejtim", deklaroi ai.
Ndërkohë Drejtori i Përgjithshëm i ALBPETROL, Z. Ferdinand Murati u shpreh së në mbledhjen e bordit drejtues të zhvilluar mbrëmjen e djeshme është vendosur dhënia e një kontributi prej 25 milion lekë të reja për emergjencat në zonat e përmbytura, si dhe mjetet motorike duke përballuar edhe shpenzimet për funksionimin e tyre.
Z. Murati bëri të ditur gjithashtu edhe se 420 punonjësit e ALBPETROL kanë kontribuar nga llogaria e tyre personale një shumë prej 350 mijë dollarësh për banorët e zonave të përmbytura.