Zbulime të reja pranë piramidave të Egjiptit

Arkeologët egjiptianë kanë zbuluar një seri varresh të reja që u përkasin punëtorëve të cilët ndërtuan piramidat e mëdha. Zbulimi hedh dritë mbi mënyrën e jetesës dhe të ushqyerit e këtyre njerëzve 4 mijë vjet më parë.

Mijëra njerëzit që ndërtuan mrekullinë e fundit të botës së lashtë hanin mish rregullisht, punonin me sistem tre turnesh dhe gëzonin të drejtën për t’u varrosur në varre prej tulle nën hijen e piramidave të shenjta që kishin ngritur vetë.

Varret e zbuluara kohët e fundit i përkasin Dinastisë së Katërt të Egjiptit kur u ngritën piramidat e mëdha, sipas kreut të Këshillit Suprem të Antikitetit, Zahi Havas.

Varre të këtij lloji, thotë ai, u zbuluan fillimisht në vitet 90 dhe zbulime të tilla tregojnë se këta njerëz ishin punëtorë me mëditje dhe jo skllevër siç përfytyrohen zakonisht.

“Ndërtuesit e piramidave ishin egjiptianë dhe nuk ishin skllevër sepse ata u varrosën pranë piramidave.”

Zbulimet tregojnë se të 10 mijë ndërtuesit e piramidave hanin çdo ditë 21 lopë dhe 23 dele që u dërgoheshin nga fshatrat veriorë dhe jugorë të Egjiptit. Punëtorët shkëmbenin turnet çdo tre muaj dhe varret u përkasin vetëm atyre që vdiqën gjatë ndërtimit.

Zbulime të tilla nxjerrin në pah aspekte të tjera të jetesës në shoqërinë e lashtë egjiptiane përveç monumenteve dhe tempujve prej guri që frekuentoheshin nga sundimtarët dhe të pasurit e tjerë.

Varret e punëtorëve bëheshin zakonisht prej tullash të prodhuara me baltë. Varri më i rëndësishëm i zbuluar, thotë zoti Hawass, i përkiste një njeriu të quajtur Idu. Rreth tij u gjetën edhe vendvarrime të tjera që përmbanin skelete dhe poçe prej balte.