PS:Prokuroria të nis hetimin për OSSH,për vjedhje

Deputeti i Partisë Socialiste, Erion Braçe, u shpreh sot se faturat e reja të vendosura nga OSSH për energjinë janë një vjedhje e hapur e qytetarëve shqiptarë. “Qytetarin shqiptar e vjedh cilido që ka mundësi ta bëjë këtë dhe askush nuk e mbron. Qeveria po hesht dhe barra e përgjegjësisë është direkt e saj”, u shpreh Braçe. Sipas deputetit socialist qytetarët po paguajnë vjedhjen më të shtrenjtë!

Më poshtë fjala e plotë e deputetit Erion Braçe:
"Dje u detyrova të paguaj faturën e energjisë elektrike për muajin janar! Ashtu siç disa qindra mijë qytetarë anekënd vendit!
Vjedhja që paralajmërova në këtë podium një javë më parë, përmes aplikimit të çmimit të rritur të janarit që në dhjetor, po konsumohet! Për fat të keq dhe do paguhet nga çdo familje shqiptari! Rritja marramendëse e çmimit të energjisë elektrike që paralajmëruam që në dhjetor të vitit që shkoi, po konsumohet! Për fat të keq dhe po paguhet po kaq shtrenjtë nga çdo familje shqiptari.
Shërbimi mizerabël deri në kufijtë e grabitjes, përmes faturimit abuziv të kilovatëve të energjisë, shpesh afrofe dhe larg syve të qytetarëve, vijon të konsumohet siç më parë! Për fat të keq dhe po paguhet me çmim të rritur!
Të treja në një faturë!
Pra po ndodh:
-       qytetarët po paguajnë vjedhjen përmes faturimit të energjisë së konsumuar në dhjetor më çmimet që janë ligjore në janar
-       qytetarët po paguajnë çmimin e ri të energjisë të rritur tre herë: për fashën deri në 300 kë nga 7.00 lekë në 7.70 lekë; për fashën mbi 300 kë nga 12.00 lekë në 13.50 lekë; për energjinë e ambienteve të përbashkëta nga 7.00 lekë në 8.00 lekë
-       qytetarët po paguajnë me çmimet e rritura edhe energjinë e pakonsumuar të faturave si afrofe, apo energjinë përtej ditëve kalendarike të një fature normale, nga 30 në 35 ditë.
Më shkoqur: qytetarët po paguajnë vjedhjen më të shtrenjtë!
Ky është kulmi! Qytetarin shqiptar e vjedh cilido që ka mundësi ta bëjë këtë dhe askush nuk e mbron. Qeveria po hesht dhe barra e përgjegjësisë është direkt e saj.
Kavalieri moralist, Sali Berisha po hesht dhe përgjegjësia është direkt e tij. Nuk besoj se do të evokojë kohën kur ishte në fshat dhe ndriçohej me qiri. Qirifikimi dhe Sali Berisha janë një simbiozë e papërsëritshme, thuajse e njëjtë me atë të kalit të vjedhur dhe Sali Berishës.
Cilido që pyet sot se çlidhje ka Sali Berisha me faturat e energjisë elektrike të lëshuara nga një kompani private, dua të sqaroj:
Pronësia në kompaninë OSSH dhe pas privatizimit është 75% CEZ dhe 25 % Qeveria e Sali Berishës. Sot, 10 ditë pas denoncimit Sali Berisha, me 25% të aksioneve që disponon duhet të kishte mbajtur qëndrim.
Pronësia e CEZ mbi OSSH, u garantua nga një proces privatizimi drejtuar e përcaktuar nga Qeveria e Sali Berishës. Shërbimi publik u transferua si monopol ekskluziv shtetëror tek klienti politik i Sali Berishës dhe ai mesa duket trashëgoi deri në fund me gëzim, një shërbim mizerabël që vjedh.
Vendimi për rritjen e çmimit të energjisë elektrike që tani po shërben për të shtrenjtuar dhe vjedhjen, u morr nga një ent thellësisht politik dhe nën ndikimin direkt të Sali Berishës.
Nisur nga sa më sipër, PS i kërkon prokurorisë të nisë procedim penal për këtë vjedhje masive që po i bëhet qytetarëve shqiptarë. Procedimi penal nuk mund të jetë i njëanshëm, vetëm në rastin kur qytetari vjedh dhe nuk paguan energjinë, ai duhet të ndodhë doemos edhe kur qytetari vidhet për energjinë me një faturë që është titull ekzekutiv."