Albin Kurti:Gjykatësit e EULEX-it u japin urdhëra institucioneve

Sot u mbajt seanca e katërt në procesin gjyqësor kundër Albin Kurtit të rinisur nga EULEX-i. Gjykatësi de Mongeot sot kishte ndërruar rolin që ia cakton titulli gjykatës, madje edhe rolin e policit të cilin e kishte kryer në seancën e kaluar. Sot gjykatësi shërbente si politikan. Dhe nga pozita e politikanit diplomat ai i akuzoi institucionet e Kosovës për dështim. Në urdhrat e tij të cilat sot i kishte me bollëk, gjykatësi vërejti “jokapacitetin e institucioneve të Kosovës për të siguruar kushtet për një gjykim korrekt dhe për ta administruar drejtësinë”. Këto vërejtje të gjykatësit i drejtoheshin të gjitha institucioneve të ligjit në Kosovë: gjykatave, policisë, avokatëve, … Me këtë de Mongeot synon ta arsyetojë praninë e EULEX-it këtu – këto akuza i kemi dëgjuar shumë herë nga diplomatët e huaj që na e sollën EULEX-in në Kosovë.
Refuzimi i avokatit për t’iu përgjigjur urdhrit të gjykatësit që të merr pjesë në seancat gjyqësore si avokat mbrojtës, refuzimi i gjykatësve që të marrim pjesë në Trupit Gjykues të EULEX-it, si dhe mosarrestimi i Albinit nga Policia e Kosovës nuk janë dështime të këtyre institucioneve, por akte padëgjueshmërie, akte rezistence ndaj kësaj shpërfillje që EULEX-i po ia bën vullnetit të qytetarëve. Gjykatat, policia dhe avokatët këtë radhë janë duke e dëgjuar popullin e Kosovës dhe duke u bërë bashkë me të.
Dhe për këtë EULEX-i kërkon t’i dënojë. Gjykatësi sot urdhëroi nisjen e procedurës disiplinuese kundër Ramiz Krasniqit për shkak të padëgjueshmërisë së tij. Ndërkohë që caktoi kryetarin e Odës së Avokatëve Musa Dragushën si avokat mbrojtës të radhës. Ishte pikërisht kryetari i Odës ai që i doli në mbrojtje Ramiz Krasniqit kur ky i fundit kërcënohej me marrje licence për padëgjueshmërinë e tij. Dhe tash Trupi gjykues i EULEX-it po e dënon Musa Dragushën sepse i doli në krah Ramiz Krasniqit. Vetëm e vetëm me qëllim të disiplinimit të tyre. Sepse EULEX-i realisht këtu është për të na disiplinuar që të jemi të dëgjueshëm ndaj tij, dhe asgjë tjetër.
Trupi Gjykues urdhrat e mëposhtëm do t’ia dorëzojë Kryetarit të Gjykatës Supreme të Kosovës, Gjykatës së Qarkut të Prishtinës, Odës së Avokatëve të Kosovës dhe Policisë së Kosovës. Këto janë 6 urdhrat e de Mongeotit:
• Musa Dragusha caktohet ta zëvendësojë Ramiz Krasniqin
• Të gjitha kopjet e vërejtjeve ndaj Ramiz Krasniqit do t’i dërgohen Odës së Avokatëve për të filluar procedurën disiplinore ndaj tij
• Urdhëron autoritetet kompetente që ta caktojnë një gjykatës tjetër për Trupin Gjykues
• Dërgimi i këtyre urdhrave të institucioneve kompetente
• Shtyrja e seancës për 13 prill 2010
• Urdhëron Policinë e Kosovës për ta shoqëruar Albinin në seancën e 13 prillit.
Ne përshëndesim mosparaqitjen e Ramiz Krasniqit në seancën e sotme. Po ashtu i ftojmë të gjithë avokatët që të mos i përgjigjen caktimit për pjesëmarrje në këtë proces gjyqësor. Ftojmë gjykatësit e Gjykatës së Qarkut që ta refuzojnë pjesëmarrjen në këtë Trup Gjykues. Si dhe ftojmë policët e Kosovës që të vazhdojnë të “mos e shohin” Albinin nëpër rrugët e Kosovës.