PD-PS,larg konsensusit per hetimin e zgjedhjeve

Konsensusi mes mazhorancës dhe opozitës, që duhej t'i jepte fund krizës politike në vend, duket i pamundur, pasi palët në Komisionin e Ligjeve vijojnë të mbrojnë fort qëndrimet fillestare, për mënyrën sesi duhet të bëhet transparenca e zgjedhjeve të 28 Qershorit. Gjatë diskutimit në parim për nismën e PS në lidhje me ndryshimet e propozuara për funksionimin e komisioneve parlamentare, anëtarët e djathtë lanë qartë të kuptohet se nuk do të pranojnë kushtin kryesor, që lidhet me hapjen e kutive. Por opozita në komision argumentoi përmes debateve se mazhoranca po lexon së mbrapthi kushtetutën, për të injoruar qëllimisht transparencën që selia rozë kërkon nëpermjet ngritjes së komisionit hetimor. Socialistët argumentuan se nuk cënohen kompetencat e organeve të drejtësisë, por mazhoranca e ka përdorur këtë fakt për t'i kërkuar PS ti drejtohet prokurorisë dhe jo hetimit parlamentar, nëse ka fakte për manipulime zgjedhjesh. Në këtë pikë, palët iu referuan Rruzhdies dhe falsifikimit me kartat e identitetit. Komisioni i ligjeve ka shtyrë për të hënën diskutimet e tjera për projektligjin e Partisë Socialiste për hetimin parlamentar. Në thelb, këto nisma, që do t'i paraqiten në 18 mars parlamentit, synojnë hetimin të pakushtëzuar të zgjedhjeve, duke përfshirë hapjen e kutive. Një tjetër pikë, që kërkohet të ndryshohet, lidhet me faktin që opozita të ketë gjithmonë shumicën në këto komisione. Por ajo që ka sjellë më shumë debate, neni 4 i projektligjit, lidhet me instrumentet e hetimit parlamentar, për të cilat mazhoranca pretendon se ndërhyn në kompetencat e prokurorisë. Për këtë, demokratët duket se do të përgatisin amendamente mbi ato të socialistëve që mesa duket do të çojë palët me dy raporte në parlament.