Faqe e parëArkivëKontaktRSS

Aragones: Triumf i merituar, i gjithi i lojtarëve

Një punë, që i ka dhënë edhe titullin si Kampion Evrope, i cili është i dyti në historinë e vendit iberik. Kombëtarja spanjolle arriti të jetë shumë e suksesshme në Evropianin që u zhvillua në Austri dhe Zvicër, duke i fituar të gjitha takimet e zhvilluara. “Ky triumf është i gjithi për lojtarët, pasi e kanë merituar plotësisht. Askush nuk mund ta mohojë, kemi një ekip jashtëzakonisht të mirë. Nuk kam asnjë ankesë. Sa herë kemi topin në zotërim, është e vështirë që kundërshtari të na rezistojë. Kjo ëstë ajo që ndiej dhe nuk po flas në një moment gëzimi. Djemtë realizuan objektivin e tyre”, tha Luis Aragones. Ndërkohë, kur u pyet nëse do të festonte këtë titull, ai tha: “Unë thjesht do të shoqëroj lojtarët e mi në festën e tyre. E thashë më parë dhe e përsëris që janë ata triumfuesit e vërtetë të këtij titulli”. Trajneri, që për pak kohë mbush 70 vjeç, ka arritur të bëjë një punë të shkëlqyer me skuadrën e tij, e cila në këtë kompeticion tregoi një fytyrë krejt ndryshe nga dy vite më parë, në Kupën e Botës. Ajo u tregua mjaft e saktë taktikisht, me një loje me pasime të shpejtë dhe me një sulm shumë të rrezikshëm. Mjafton të përmendësh faktin që David Vila arriti të jetë golashënuesi më i mirë i Evropianit me katër gola, ndërkohë që Fernando Torres ka shënuar dy, përfshirë edhe atë në finalen e Vjenës. “Ky titull i merituar, thjesht ka treguar se kemi shumë për të dhënë në botën e futbollit”, përfundoi deklaratën e tij trajneri Luis Aragones.
Mesfushori i ri i Barcelonës, Andres Iniesta është shfaqur shumë i emocionuar, aq sa nuk ka patur fjalë për të përshkruar atë që ndjente pas triumfit spanjoll. “Kemi djersitur shumë dhe mundi na u shpërblye. Ekipi ka dhënë gjithmonë paraqitje të mira dhe mendoj se në fund ky sukses ishte i merituar për të gjithë futbollin spanjoll në përgjithësi, për atë që ka treguar gjatë viteve të fundit”.


Sena: Momenti më i lumtur
Mesfushori i Vilarealit, Markos Sena ka deklaruar se triumfi në Evropian i ka dhuruar “momentin më të bukur të të gjithë karrierës së tij futbollistike”. “E merituam të fitonim – është shprehur një nga lojtarët më të dalluar të Kombëtares spanjolle -. Pa frikë mund ta cilësoj si arritjen time më të madhe në karrierën futbollistike. Prandaj dëshiroj ta festoj sa më shumë”.

Kasijas: Realizova një ëndërr
Kapiteni i Spanjës, Iker Kasijas, është shprehur se me fitimin e trofeut të kampionit të Evropës 2008, realizoi një nga ëndrrat e tij si profesionist: “Vërshëllima e fundit e gjyqtarit solli një përzierje gëzimi dhe emocionesh të shumta, aq sa s’isha i vetëdijshëm për atë që ndodhi. Por e vërteta është se s’mund të shpjegoj dot ndjenjat. Thjesht kam një gëzim të pamasë”.


Thënie të famshme nga Euro 2008

•  “Në futboll, ai që thotë se është i sigurt për atë që do të ndodhë, është sharlatan. Nuk dua të jem sharlatan, megjithatë po ju them se Evropianin do ta fitojë Kroacia”.
Miroslav Blazeviç, ish-trajner i Kroacisë, para çerekfinales Kroaci-Turqi.

•  “Te ne nuk ka rrugë të mesme. Kur fiton je hero, kur humbet je zero”.
Nihat Kafexhi qëndronte me këmbë në tokë edhe pas ndeshjeve çudibërëse të Turqisë së tij.

•  “Kur shënova, ua bëra me shenjë që të heshtnin, sepse më kishte ardhur deri në fyt. Para ndeshjes dukej sikur ishin ata që kishin fituar tri herë Botërorin dhe jo ata që as nuk shihnin top me sy”.
Mikael Balak pas ndeshjes me Austrinë. 

•  “Ne ju çojmë të shihni fytyrën e humbësve”.
Slogani publicitar i një agjencie turistike gjermane pas ndeshjes Austri-Gjermani 0-1.

•  “Jam një gjysh që i shfaq pak ndjenjat e tij, megjithatë jam shumë i lumtur. Këtu kanë ardhur disa nipër të mi dhe njëri prej tyre pothuajse më bëri të qaj. Imagjinojeni vetë sa i kënaqur jam”.
Gjyshi Luis Aragones pas ndeshjes Rusi-Spanjë.

•  “Bier en titen! (Birrë dhe gjokse!)”
Kor i tifozëve holandezë në mbështetje të skuadrës së tyre, brenda dhe jashtë stadiumit.


Torres bën “mbretëreshë” Spanjën

Episodi final i filmit të Evropianit dhuron një triumf të bukur dhe të paparashikuar të Spanjës.

Iberikët kanë thyer Gjermaninë me rezultatin 1-0, duke u shpallur kampionë të Evropës për të dytën herë në historinë e tyre. Në këtë titull mbizotëron emri i Fernando Torres, i cili ishte autori i golit të fitores dhe arriti të bëjë diferencën, duke rrezikuar portën e kundërshtarit sa herë që prekte topin. Gjermania e nisi mirë lojën, por u zbeh mjaft shpejt, e paaftë për të thyer ushtrinë e Luis Aragones.
Gjermania nis frikshëm
Zotërimi i topit deri në mërzi kundër presionit nëpër krahë. Spanja, që luan për të zënë në befasi kundërshtarin, kurse Gjermania që sulmon pa frikë. Një skenar i parashikueshëm, por tepër me rrisk për “furinë e kuqe” të Aragones, që për një çerek ore pëson lojën e shpejtë të gjermanëve, të aftë për të ndërprerë valën e iberikëve, të cilët janë nisur me një frikë të dukshme. Spanja vuan, aq sa jep përshtypjen se po mbytet. Por falë cilësisë që zotëron arrin të ngrejë kokë dhe të korrigjojë defektet. Një armë e rrezikshme bëhet shtytja nga krahët dhe saktësia në krosime. Ia del mbanë Serxhio Ramos, në të 23’, kur ka peshkuar saktë kokën e Torres, i cili kërcen fuqishëm, por shtylla i mohon golin. Kështu, Spanja bëhet “padrone” e fushës. Në të 33’, stadiumi i Vjenës ka shkëlqyer. Fabregas verbon gjermanët, me një vertikalizim milimetrik për Torres. I ashtuquajturi “El Niño” ka arritur të fitojë duelin me Lahm dhe me një parabolë magjike ka dërguar topin prapa krahëve të Lehman që ka dalë më kot. Numrat flasin qartë: Spanja shumë më përpara, falë një mesfushe të mrekullueshme, e gatshme për të vendosur në vështirësi prapavijën e dobët gjermane.
Dominimi
Spanja duket sikur “shtyp” Gjermaninë, që ka tentuar të përforcohet në sulm me Kuranjin. Por gjermanët historikisht kanë shtatë jetë dhe e djathta e Balak që përfundon ngjitur me shtyllën, është sinjal për t’u mos nënvlerësuar. Aragones nis të ruhet, duke hequr Fabregas për Ksabi Alonson dhe Silvën për Kacorlën. Por është Lehman që ndreq gabimet e mbrojtjes së tij. Duket se dyfishimi i rezultatit është fare afër, megjithatë kur Guzia shërben si spondë, Sena mbërrin me vonesë drejt topit. Pavarësisht mungesës së golit, simfonia spanjolle ka tingëlluar fort, me qarkullim topi dhe veprime klasi, të shoqëruara nga britmat e tifozëve. Ndërsa vërshëllima e trefishtë e Rosetit i ka dhënë hov të mëtejshëm festës së “toreadorëve”.

Gjermani – Spanjë  0-1

Goli: Torres 33’
Gjermania (4-2-3-1): Lehman, Fridrih, Mertesaker, Metzelder, Lahm (Jansen 46’), Frings, Hicelsberger (Kuranji 58’), Shvainshtaiger, Balak, Podolski, Klose (Gomez 79’)
Trajner: Joakim Lëv
Spanja (4-1-4-1): Kasiljas, Ramos, Marçena, Pujol, Kapdevila, Sena, Iniesta, Ksavi, Fabregas (Alonso 64’), Silva (Kazorla 66’), Torres (Guiza 78’)
Trajner: Luis Aragones
Kartona të verdhë: Balak, Kuranji / Kasiljas, Torres
Gjyqtarë: Roberto Roseti (ITA)
Spektatorë: 51,428


statistikat

Gjermani      Spanjë
1        Gjuajtje në portë            7
2        Gjuajtje jashtë porte             8
52%    Mbajtja e topit            48%
4        Goditje këndi            7
5        Pozicione jashtë loje        4
21    Ndërhyrje të gabuara        19
2        Kartona të verdhë            2
0        Kartona të kuq            0

Komente

i lumte spanjes ishin nje nder ekipet me te mir te keti kompeticionit evropian me gjithe turqi.suksese ne te ardhme spanjes
Postuar nga eraldi ne daten 30-06-2008

---

Emri	:
E-mail	:
Komenti	:
Kodi	:	Shkruani kodin qe shihni me larte...

Shenim

  Stafi i faqes ka te drejte te fshije te gjithe
  komentet qe nuk i pershtaten temes...

• Faqe e pare
• Foto Lajm
• Kontakt
• Arkive
• Argetim